ଦୁର୍ଗାପ୍ରସାଦ ପଣ୍ଡା
![](https://odishasahitya.com/wp-content/uploads/2024/05/ଦୁର୍ଗାପ୍ରସାଦ-ପଣ୍ଡା.jpg)
ଗୋଟିଏ ଚାଉଳରେ ଗଢା
ମୋର ଏ ଉଦାସୀ ଆଖି
କିନ୍ତୁ ଖାଲି ଦେଖିବାର
କଳାଟି ଶିଖିବାକୁ
ଏ ଆଖିକୁ ଲାଗିଗଲା ଅନେକ ବର୍ଷ ।
ଏବେ ବେଳ ବୁଡ଼ିଆସିଲା ବେଳକୁ
କେଜାଣି କାହିଁକି ବେଶି ବେଶି
ସଫା ଦିଶୁଚି ଚାରିପାଖର ଦୃଶ୍ୟ,
ଆହୁରି ଫର୍ଚ୍ଚା ଦିଶୁଚି
ପୃଥିବୀ ଆଉ ଆକାଶ ।
କିଏ ମନେରଖିଚି
କେତେ କଣ ଯେ ଭାସି ଆସିଚି
ଏ ଆଖିର ପାଣି ସୁଅରେ
କାହାକୁ ବି ଧରି ରଖି ନାଇଁ ଏ ଆଖି
ଜହ୍ନ ବି ଛୋଟ ଛୁଆଟେ ପରି
ଖେଳିଚି ଚବର ଚବର କରି
ଏ ଆଖିର ଟୁବି ଗାଡ଼ିଆରେ ।
ସୁନ୍ଦର ଅସୁନ୍ଦର
ଏମିତି କେତେ କେତେ ଦୃଶ୍ୟର
ରସକୁ ଚିପୁଡ଼ି ଚୋଷି ଖାଇଚି ଏ ଆଖି
ଆଉ ଚୋପାକୁ
ଲେଞ୍ଜରା କରି ଫିଙ୍ଗିଚି ପଦାରେ ।
ଆଖି ମୋର ବେଶ ନିପୁଣ
ପାଇ କରି ପୁଣି ହଜେଇ ଦେବାରେ ।
ଭୋଗର ଅତଳତଳ ଜଳରେ
ଏବେ ଭଉଁରୀ ଖେଳୁଚି ବୈରାଗ୍ୟ
ଆଖି ମୋର ପଡ଼ିଯାଇଚି,
ଘୁରିଘୁରି ବୁଡୁଚି ଆଉ ଉଠୁଚି ତାରି ଭିତରେ ।
ସମ୍ବଲପୁର, ମୋ : ୯୪୩୮୦୭୪୪୧୪
ଲେଖକ ପରିଚୟ
ଉଭୟ ଇଂରାଜୀ ଓ ଓଡ଼ିଆ ଭାଷାରେ କବିତା, ଅନୁବାଦ, ସମାଲୋଚନା ଆଦି ବିଭିନ୍ନ ପ୍ରତିଷ୍ଠିତ ପତ୍ରପତ୍ରିକାରେ ପ୍ରକାଶିତ । ୩ ଟି କବିତା ସଂକଳନ ସହିତ ବରିଷ୍ଠ କବି ଜେ. ପି. ଦାସଙ୍କ ଓଡ଼ିଆ କବିତାର ଇଂରାଜୀ ଅନୁବାଦ ସଂକଳନ ପ୍ରକାଶିତ । ସଂପ୍ରତି କେନ୍ଦ୍ର ସାହିତ୍ୟ ଏକାଡ଼େମୀ ଦ୍ଵାରା ଅନୁବନ୍ଧିତ ହେଇ ବିଶିଷ୍ଟ କବି ଜୟନ୍ତ ମହାପାତ୍ରଙ୍କ ସାମଗ୍ରିକ କୃତିର ସମ୍ପାଦନାରେ ନିବିଷ୍ଟ ।