ଫୁଲ ମୂଲ

ବିଶ୍ୱଜିତ୍ ପାଣି

ଫୁଲ ବନେ ଫୁଲ ଫୁଟେ ଅମୂଲ ସେ ଫୁଲ ମୂଲ
ଯଦି ନବସିଲା ତହିଁ ଭ୍ରମର ତା’ ମଧୁ ଆଶେ,
ଖାଲି ଫୁଟି ମଉଳିଲେ କି ଅବା ହେଲା ଅସୁଲ
ଯଦି ନହସିଲା ମହୀ ନବାସିଲା ତା’ ସୁବାସେ ।

ଦିବାକର କିରଣରେ ଯଦି ରଙ୍ଗ ନଖେଳିଲା
ନଝୁଲିଲା ଯଦି କେବେ ଦେବା-ଦେବୀଙ୍କର ଗଳେ,
ପ୍ରେମୀ ହୃଦୟରେ ଯଦି ମହଲଟେ ନ ତୋଳିଲା
ନଖୋସିଲା ତରୁଣୀଟେ ସରାଗେ ନେଇ ତା’ ଚୂଳେ ।

ଚପଳ ଶୈଶବେ ଯଦି ନସାଜିଲା ସହଚରୀ
ପରାଗରେଣୁ ତା’ ନେଇ ପ୍ରଜାପତି ନଉଡ଼ିଲା,
ମଧୁଶେଯେ ନବବଧୂ ସରମ ନଦେଲା ସାରି
ବିରହ ବେଦନା ଯଦି ଫୁଲ ହୋଇ ନଫେଡ଼ିଲା ।

ନଝରିଲା ଯଦି କେବେ କବିତାର ପଂକ୍ତି ହୋଇ
କି ଲାଭ ନିଜେ ତୁ କହ ଫୁଲରାଣୀ ମତେ ଚାହିଁ ।

ଜଗତସିଂହପୁର ଜିଲ୍ଲା କୁଜଙ୍ଗ ବ୍ଲକ୍, ସନ୍ତରା, ମୋବାଇଲ ନଂ- ୯୭୭୬୬୪୮୩୧୫

_{ଲେଖକ ପରିଚୟ}

_{ଓଡ଼ିଶା ବିଦ୍ୟୁତ୍ ସଞ୍ଚାଳନ ନିଗମ ଲିଃ ରେ ଟେକ୍ନିସିଆନ୍ ଭାବେ କାର୍ଯ୍ୟରତ ହେଲେ ପିଲାବେଳୁ ଚିତ୍ର ଆଙ୍କିବା ସହିତ ସାହିତ୍ୟରେ ରୁଚି ରହିଆସିଛି । ଛନ୍ଦ କବିତା କେଖିବାକୁ ଭଲଲାଗେ । ପୂର୍ଣ୍ଣ କବିତାଟେ ହେଉ ବା ଚିତ୍ର, ସାରିଲା ପରେ, ନୂଆ ଆବିଷ୍କାରଟେ କଲାପରି ଅନୁଭବ ହୁଏ ।}