ଭୁବନେଶ୍ଵର : ଯାଜପୁର ସଂସ୍କୃତି ଓ ବିକାଷ ପରିଷଦ ପକ୍ଷରୁ କବିମଞ୍ଜୁଳ କୃଷ୍ଣପ୍ରସାଦ ବସୁ, ଆଦିନେତା ବିଚିତ୍ରାନନ୍ଦ ଦାସଙ୍କ ପୁଣ୍ୟତିଥି ଓ ନାଟ୍ୟକାର କାମପାଳ ମିଶ୍ରଙ୍କ ଜୟନ୍ତୀ ପାଳନ ଅବସରରେ ଏକ ଆଲୋଚନାଚକ୍ର ଗୀତଗୋବିନ୍ଦ ସଦନରେ ଅନୁଷ୍ଠିତ ହୋଇଯାଇଛି । ସମାଜସେବୀ ନଟବର ମହାନ୍ତିଙ୍କ ସଭାପତିତ୍ୱରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ପୂର୍ବତନ ଅର୍ଥମନ୍ତ୍ରୀ ପ୍ରଫୁଲ୍ଲ ଚନ୍ଦ୍ର ଘଡ଼ାଇ, ବିଶିଷ୍ଟ ସାହିତ୍ୟିକ ଦାଶ ବେନହୁର, ଶିକ୍ଷାବିତ ବିଜୟ କୁମାର ଶତପଥୀ, ମୃତ୍ୟୁଞ୍ଜୟ ରଥ ପ୍ରମୁଖ ଯୋଗ ଦେଇ କବିମଞ୍ଜୁଳ ବସୁ ଓ ନାଟ୍ୟକାର କାମପାଳ ମିଶ୍ରଙ୍କ ସାହିତ୍ୟ କୃତି ଓ ଉଚ୍ଚକୋଟୀର କାବ୍ୟ ରଚନା ଉପରେ ଆଲୋଚନା କରିଥିଲେ ।
ଏଥିସହିତ ଆଦିନେତା ବିଚିତ୍ରାନନ୍ଦ ଦାସଙ୍କ ଓଡ଼ିଆ ଭାଷାର ପ୍ରସାର ଓ ବହୁ ଶିକ୍ଷାନୁଷ୍ଠାନ ଗଠନରେ ଭୂମିକା ସମ୍ପର୍କରେ ଆଲୋଚନା କରିଥିଲେ । ସାଧାରଣ ସମ୍ପାଦକ ନୀଳମଣି କର ପରିଷଦର ବିଭିନ୍ନ କାର୍ଯ୍ୟକ୍ରମ ଓ ଆଭିମୁଖ୍ୟ ସମ୍ପର୍କରେ ସୂଚନା ଦେଇଥିଲେ । ଉପଦେଷ୍ଟା ମହେନ୍ଦ୍ର କୁମାର ମଲ୍ଲିକ ଅତିଥି ପରିଚୟ ପ୍ରଦାନ କରିଥିବା ବେଳେ ଉପସଭାପତି ଆଶୁତୋଷ ମିଶ୍ର ଧନ୍ୟବାଦ ଦେଇଥିଲେ । ଏହି ଅବସରରେ ଶିକ୍ଷାବିତ ନୃସିଂହ ଚରଣ ଷଡ଼ଙ୍ଗୀ, ଗୀତକବି ବସନ୍ତ ଦାସ, ଚିକିତ୍ସକ ଅକ୍ଷୟ କୁମାର ମିଶ୍ରଙ୍କୁ ସମ୍ବର୍ଦ୍ଧିତ କରାଯାଇଥିଲା । ଏଥିସହିତ ଗୁରୁ ଉମେଶ ଦାଶଙ୍କ ନେତୃତ୍ୱରେ ଆଶାବରୀ ସଙ୍ଗୀତ ସଂସ୍ଥା ପକ୍ଷରୁ ଶିଳ୍ପୀମାନେ ସଙ୍ଗୀତ ପରିବେଷଣ କରିଥିଲେ । ସଭାରେ ଆଇନଜୀବି ନଟବର ପଣ୍ଡା, ‘ଝୁମୁକା’ର ସମ୍ପାଦକ ମାନସ ରଞ୍ଜନ ସାମଲ, ନୃସିଂହ ଚରଣ ମହାପାତ୍ର, ଅମୂଲ୍ୟ କୁମାର ଦାସ, ବିଭୂତି ଭୂଷଣ ମହାପାତ୍ର, ପ୍ରସନ୍ନ କୁମାର ରଥ, ପ୍ରବୀଣା ପରିଡ଼ା, ସୌଦାମିନୀ ବେହେରା, ଅଜୟ କୁମାର ମହାପାତ୍ର ପ୍ରମୁଖ ଉପସ୍ଥିତ ଥିଲେ ।
