ଭୁବନେଶ୍ଵର : ପ୍ରକାଶନୀ ସଂସ୍ଥା ‘ପେନ୍ ଇନ୍ ବୁକ୍ସ’ ଦ୍ଵାରା ପ୍ରକାଶିତ ଘନଶ୍ୟାମ ପାଣିଗ୍ରାହୀଙ୍କ ତୃତୀୟ ଗଳ୍ପ ସଂକଳନ ‘ଚିର୍ କୁଟ୍’ ପଟିଆ ସ୍ଥିତ ଏକ ତାରକା ହୋଟେଲରେ ଉନ୍ମୋଚିତ ହୋଇଯାଇଛି । ପ୍ରକାଶନ ସଂସ୍ଥାର ଉପମହାପ୍ରବନ୍ଧକ ତଥା ଲେଖକ ପ୍ରକାଶ ମହାପାତ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ପୁସ୍ତକ ଉନ୍ମୋଚନ ଉତ୍ସବରେ ମୁଖ୍ୟ ଅତିଥି ଭାବେ ସାହିତ୍ୟିକ ଓ ସ୍ତମ୍ଭକାର ଦାଶ ବେହେନୁର ଯୋଗ ଦେଇଥିଲେ । ଅତୀତକୁ ମନେ ପକେଇବା ଏକ ସୁଖଦ ଅନୁଭବ ବୋଲି ସେ କହିଥିଲେ । ଗାଳ୍ପିକ ଶ୍ରୀ ପାଣିଗ୍ରାହୀଙ୍କ ଭଳି ପ୍ରକାଶନ ବିମୁଖ ଲେଖକଙ୍କୁ ‘ପେନ୍ ଇନ୍ ବୁକ୍ସ’ ପ୍ରକାଶ ମନସ୍କ କରେଇପାରିଥିବାରୁ ସେ ଖୁସି ବ୍ୟକ୍ତ କରିଥିଲେ ।
ଏଥିପାଇଁ ସେ ଦୁଇ ବର୍ଷ ଭିତରେ ତିନିଟି ଲୋକପ୍ରିୟ ଗଳ୍ପ ସଂକଳନ ପ୍ରକାଶ କରିପାରିଛନ୍ତି ବୋଲି ଶ୍ରୀ ବେହେନୁର କହିଥିଲେ । କାର୍ଯ୍ୟକ୍ରମର ମୁଖ୍ୟବକ୍ତା ବିଶିଷ୍ଟ କଥାକାର ଗୌରହରି ଦାସ କହିଲେ ଯେ ତିନି ଦଶନ୍ଧି ପୂର୍ବେ ‘ଅର୍ପଣ’ ପତ୍ରିକା ଆରମ୍ଭ କରି ସାହିତ୍ୟର ସେବା କରିଥିଲେ ଗାଳ୍ପିକ ଘନଶ୍ୟାମ ପାଣିଗ୍ରାହୀ । ମଞ୍ଚ, ସ୍ୱୀକୃତି ତଥା ପ୍ରଶସ୍ତିର ଅପେକ୍ଷା ନରଖି ସେ ନିରବରେ ଲେଖା ଜାରି ରଖିବା ସାହିତ୍ୟ ଜଗତ ପାଇଁ ଶୁଭଂକର ଖବର । ନିଜେ ଅଙ୍ଗେ ନିଭାଇଥିବା ଅନୁଭୂତି ସବୁକୁ ଚମତ୍କାର ଭାବେ ଶବ୍ଦରେ ସଜେଇବାରେ ଗାଳ୍ପିକ ଶ୍ରୀ ପାଣିଗ୍ରାହୀ ବେଶ ପାରଙ୍ଗମ । ତାଙ୍କ କାହାଣୀରେ ବିଭିନ୍ନ ବର୍ଗର ପାଠକ ନିଜକୁ ଓ ନିଜ ସମୟକୁ ଠାବ କରିପାରିବେ ବୋଲି ମୁଖ୍ୟବକ୍ତା ଶ୍ରୀ ଦାସ କହିଥିଲେ । ସାମ୍ବାଦିକ ତଥା ଲେଖକ ଭାସ୍କର ପରିଚ୍ଛା ପୁସ୍ତକ ସମ୍ବନ୍ଧରେ ପାଠକୀୟ ଅଭିବ୍ୟକ୍ତି ରଖିଥିଲେ । ପେନ୍ ଇନ୍ ବୁକ୍ସ ପ୍ରକାଶନ ସଂସ୍ଥାର ସହମହାପ୍ରବନ୍ଧକ ତଥା କବି ପବିତ୍ର ମୋହନ କର ସଭା ପରିଚାଳନା କରିବା ସହିତ ଧନ୍ୟବାଦ ଦେଇଥିଲେ ।
