ଭୁବନେଶ୍ୱର : ହଙ୍ଗେରୀର ପ୍ରଖ୍ୟାତ ଔପନାସିକ ଲାସଲୋ କ୍ରାସ୍ନାହୋରକାଇ ସାହିତ୍ୟରେ ୨୦୨୫ ମସିହାର ନୋବେଲ ପୁରସ୍କାର ଜିତିଛନ୍ତି । ମୂଲ୍ୟବୋଧ ଯୁକ୍ତ କାଳଜୟୀ ସାହିତ୍ୟ କୃତି ପାଇଁ ତାଙ୍କୁ ଏହି ପୁରସ୍କାର ମିଳିଥିବା ନେଇ ସୂଚନା ମିଳିଛି । ୧୯୫୪ ମସିହାରେ ହଙ୍ଗେରୀର ଗ୍ୟୁଲାରେ ଜନ୍ମଗ୍ରହଣ କରିଥିବା କ୍ରାସ୍ନାହୋରକାଇ ଯୁଦ୍ଧ ପରବର୍ତ୍ତୀ ୟୁରୋପର ଦୟନୀୟ ଅବସ୍ଥା ଓ ରାଜନୀତି ଅବକ୍ଷୟ ଭିତରେ ତାଙ୍କର ସାହିତ୍ୟିକ ଜୀବନ ଆରମ୍ଭ କରିଥିଲେ । ତାଙ୍କର ପ୍ରଥମ ଉପନ୍ୟାସ ‘ସାଟାନଟାଙ୍ଗୋ’ (୧୯୮୫ ରେ ପ୍ରକାଶିତ ଉପନ୍ୟାସ) ପାଠକମାନଙ୍କୁ ଏକ ଭିନ୍ନ ରଚନାଶୈଳୀ ସହିତ ପରିଚିତ କରାଇଥିଲା । ପରବର୍ତ୍ତୀ ସମୟରେ ଏହା ବେଲା ଟାରଙ୍କ ଦ୍ଵାରା ସାତ ଘଣ୍ଟାର ଚଳଚ୍ଚିତ୍ରରେ ରୂପାନ୍ତରିତ ହୋଇଥିବା ଏକ ସାଂସ୍କୃତିକ ମାଷ୍ଟରପିସ ହୋଇଗଲା ।
୧୯୮୯ରେ ପ୍ରକାଶିତ ଉପନ୍ୟାସ ‘ଦି ମେଲାନକୋଲି ଅଫ୍ ରେଜିଷ୍ଟାନ୍ସ’କୁ ପ୍ରାୟତଃ କ୍ରାସ୍ନାହୋରକାଇଙ୍କ ଶ୍ରେଷ୍ଠ କୃତି ଭାବରେ ଦେଖାଯାଏ । ତାଙ୍କ ଲେଖାଗୁଡ଼ିକ ଅବିସ୍ମରଣୀୟ, ଏକ ଲୟବଦ୍ଧ ପ୍ରବାହ, ଯାହା ପାରମ୍ପରିକ ବିରାମ ଚିହ୍ନକୁ ଅସ୍ଵୀକାର କରେ ଏବଂ ପାଠକମାନଙ୍କୁ ଚିନ୍ତାଧାରାର ଗୋଳକଧନ୍ଦାକୁ ଆମନ୍ତ୍ରିତ କରେ । ତାଙ୍କର ବାକ୍ୟଗୁଡ଼ିକ ବେଳେବେଳେ ପୃଷ୍ଠା ପର୍ଯ୍ୟନ୍ତ ଲମ୍ବିଚି ଓ ମାନବ ଚେତନାର ନିରବଚ୍ଛିନ୍ନତାକୁ ଅନୁକରଣ କରିଛି । ସେହିପରି ‘ୱାର ଆଣ୍ଡ ୱାର'(୧୯୯୯), ‘ବ୍ୟାରନ୍ ୱେଙ୍କହେମସ ହୋମ୍ କମିଂ’ (୨୦୧୬) ପରି ପୁସ୍ତକରେ କ୍ରାସ୍ନାହୋରକାଇ ସଭ୍ୟତାର ପତନ, ସତ୍ୟର ଭଙ୍ଗୁରତା, ସତ୍ୟୋପଲବ୍ଧି ଓ ପାଗଲାମି ମଧ୍ୟରେ ପତଳା ରେଖା ସମ୍ପର୍କିତ ଧ୍ୟାନ କେନ୍ଦ୍ରିତ କରିଛନ୍ତି । ସୂଚନା ଥାଉ ଯେ କ୍ରାସ୍ନାହୋରକାଇଙ୍କ ରଚନାଗୁଡ଼ିକ ୩୦ରୁ ଅଧିକ ଭାଷାରେ ଅନୁବାଦିତ ହୋଇଥିବା ବେଳେ ବିଶ୍ଵବ୍ୟାପୀ ପାଠକମାନଙ୍କ ଦ୍ଵାରା ଆଦୃତ ମଧ୍ୟ ହୋଇଛି ।
