ଭୁବନେଶ୍ଵର : ଓଡ଼ିଆ ଭାଷା ପ୍ରତିଷ୍ଠାନର ପ୍ରତିଷ୍ଠା ଦିବସ (ଓଡ଼ିଶା ଦିବସ) ସଂସ୍କୃତି ଭବନ ସମ୍ମିଳନୀ କକ୍ଷରେ ଅନୁଷ୍ଠିତ ହୋଇଯାଇଛି । ମୁଖ୍ୟ ଅତିଥି ଭାବେ ପ୍ରଫେସର କୃଷ୍ଣଚନ୍ଦ୍ର ପ୍ରଧାନ ଯୋଗଦେଇ କହିଲେ, ପ୍ରତ୍ୟେକ ଓଡ଼ିଆ ନିଜ ମାଟି ଓ ଭାଷାକୁ ନେଇ ଗର୍ବ କରିବା ଉଚିତ । ବିଶ୍ୱରେ ଓଡ଼ିଆ ଭାଷାର ସମୃଦ୍ଧ ଲିପି ରହିଛି । ତେବେ ଓଡ଼ିଆ ଭାଷା ଶାସ୍ତ୍ରୀୟ ମାନ୍ୟତା ପାଇବା ପରେ ଭାଷାକୁ ନେଇ ଯେଉଁଭଳି କାର୍ଯ୍ୟ ହେବାକଥା ତାହା ହୋଇନାହିଁ ବୋଲି ଶ୍ରୀ ପ୍ରଧାନ ନିଜ ବକ୍ତବ୍ୟରେ କହିଥିଲେ ।
ଆଲୋଚକ ଭାବେ ‘ଆମ ଓଡ଼ିଶା’ର ସାଧାରଣ ସମ୍ପାଦକ ଅରବିନ୍ଦ ଦାସ ଯୋଗଦେଇ କହିଲେ, ଭାଷା ଭିତ୍ତିକ ସ୍ଵତନ୍ତ୍ର ରାଜ୍ୟ ହେବାର ଗୌରବ ପାଇଛି ଓଡ଼ିଶା । ଏଥିପାଇଁ ଆମେ ଗୌରବର ସହ କହୁଛୁ ‘ଆମେ ଓଡ଼ିଆ’ । ହେଲେ ଓଡ଼ିଶା ବାହାରେ ରହିଯାଇଥିବା ଓଡ଼ିଆଙ୍କ କଥା ଆମେ ଚିନ୍ତା କରିନାହୁଁ । ଓଡ଼ିଆ ରୋଜଗାରର ଭାଷା ହୋଇପାରୁ ନାହିଁ । ଏ ସମ୍ପର୍କରେ ଓଡ଼ିଆ ବୁଦ୍ଧିଜୀବି ନିରବ ରହିବା ଏ ଜାତି ପାଇଁ ଶୁଭଂକର ନୁହେଁ । ସ୍ଵାଭିମାନ ବିନା ଓଡ଼ିଆ ଅସ୍ମିତାର କୌଣସି ମାନେ ନାହିଁ । ଅନ୍ୟତମ ଆଲୋଚକ ଭାବେ ଯୋଗଦେଇ ଭାରତୀୟ ସୂଚନା ସେବାର ଅବସରପ୍ରାପ୍ତ ଆଇଆଇଏସ ବଦ୍ରିନାରାୟଣ ଅଧିକାରୀ କହିଲେ, ଭାରତରେ ମାତୃଭାଷାରେ ପାଠ ପଢାଯିବା ଉପରେ ଗୁରୁତ୍ଵ ଦିଆଯିବା ଆବଶ୍ୟକ ।
ଏହି କାର୍ଯ୍ୟକ୍ରମରେ ସଭାପତିତ୍ୱ କରି ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗର ଯୁଗ୍ମ ଶାସନ ସଚିବ ଦେବପ୍ରସାଦ ଦାଶ କହିଲେ, ଓଡ଼ିଆ ଅନୁବାଦ ଏକାଡ଼େମୀ ଖୁବ ଶୀଘ୍ର କାର୍ଯ୍ୟକ୍ଷମ ହେବା ସହିତ ଓଡ଼ିଶାରେ ଅପଭ୍ରଂଶ ହୋଇଥିବା ବିଭିନ୍ନ ନାମକ ସଂଶୋଧନ କରାଯିବ । ଓଡ଼ିଆ ଭାଷା ପ୍ରତିଷ୍ଠାନର ପ୍ରଶାସନିକ ଅଧିକାରୀ ଡ. କ୍ଷେତ୍ରବାସୀ ମାନସେଟ ଅତିଥି ପରିଚୟ ପ୍ରଦାନ କରିବା ସହିତ କାର୍ଯ୍ୟକ୍ରମକୁ ପରିଚାଳନା କରିଥିଲେ । ଏହି ଅବସରରେ ଛାତ୍ରଛାତ୍ରୀଙ୍କ ମଧ୍ୟରେ ଅନୁଷ୍ଠିତ ବକ୍ତୃତା, ପ୍ରବନ୍ଧ ଓ ଓଡ଼ିଆ ଶୁଦ୍ଧଲିଖନ ପ୍ରତିଯୋଗିତାର କୃତୀ ପ୍ରତିଯୋଗୀଙ୍କୁ ଅତିଥିମାନେ ପୁରସ୍କୃତ କରିଥିଲେ ।
