ଆମର ସମ୍ପର୍କ

ଶୁଭଶ୍ରୀ ମହାରଣା

ବିଶ୍ଵାସର ତାରବାଡ଼ରେ
ବନ୍ଧା ରହିଛି ଆମ ସମ୍ପର୍କ
ଯୋଉଠି ସନ୍ଦେହ ଓ ଅବିଶ୍ଵାସର ସ୍ଥାନ ନାହିଁ
ବସ୍ ର ସିଟ୍ କୁ ରୁମାଲ ପକାଇ
ଅକ୍ତିଆର କଲାପରି
ରଖିଛି କେବଳ ଚେନାଏ ହସ
ଓ ମୁଠାଏ ଆତ୍ମବିଶ୍ଵାସ ।

କେବେକେବେ
ତା’ର ଶାଣିତ ଶବ୍ଦକୁ
ମୋର ମୁରୁକି ହସରେ
ମୁଁ ବଶ କରିନେଇଛି
ତ କେବେକେବେ
ମୋର ଅଭିମାନକୁ
ସେ ତା’ର ଶବ୍ଦ ଚାତୁରୀରେ
ଚୁମ୍ବନ ଦେଇଛି ।

ଏମିତି ହିଁ ଆମର ସମ୍ପର୍କ …
କେବେକେବେ ଧୂଳି ଧୂସରିତ
ତ ପୁଣି କେତେବେଳେ ଚନ୍ଦନ ଚର୍ଚ୍ଚିତ ।

ପୁଞ୍ଜାପୁଞ୍ଜା କରି ଗାଁ ତୋଟାରେ
ଆମ୍ବକୁ ଭାଗ ବାଣ୍ଟିଲା ପରି
ଆମେ ଭାଗବାଣ୍ଟି ଦେଉ ଦୁଃଖକୁ,
ସୁଖକୁ ମୁଁ ଗଣ୍ଠି ପକାଇଦିଏ କାନିରେ
କେବଳ ତା’ ପାଇଁ
ଟି’କେ ସ୍ଵାର୍ଥପର ଭାବରେ,
ହଁ, ତା’ ସୁଖରେ ତ ମୋ ହସ ବନ୍ଧା ପଡ଼ିଥାଏ ।

ସେ ସେମିତି ହିଁ
ବାନ୍ଧି ରଖିଥାଏ ମତେ
ଆକଟ ଆଖିରେ ନୁହେଁ
କି ତା’ର ପୁରୁଷପଣରେ ନୁହେଁ,
ସେ ବାନ୍ଧି ରଖିଥାଏ ମତେ
ମୋ ଇଚ୍ଛା ମୁତାବକ
ବାନ୍ଧି ରଖିଥାଏ ମତେ
ତା’ ପ୍ରଶ୍ଵାସ ସହିତ ।।

ବିଡ଼ାନାସୀ, କଟକ

^{ଲେଖକ ପରିଚୟ}

^{ଶିକ୍ଷକତାକୁ ନିଜର ବୃତ୍ତି କରି କବିତା ପଢ଼ିବା ଓ ଲେଖିବାରେ ଆତ୍ମସ୍ଥ ରହିବାକୁ ଭଲପାଏ । ଦୁଃଖ, ପ୍ରେମ, ପ୍ରାପ୍ତି ଓ ପ୍ରାପ୍ତି ପରର ଦୁଃଖ ହିଁ କବିତାର ମୁଖ୍ୟ ସ୍ଵର । ଦୁଇଟି କବିତା ସଂକଳନ ପ୍ରକାଶିତ ହୋଇ ସାରିଥିବା ବେଳେ ପ୍ରଥମା ପୁରସ୍କାର ପ୍ରାପ୍ତ କବିତା ସଂକଳନ “ଶାଶ୍ଵତୀ” ଏବଂ ଦ୍ଵିତୀୟ କବିତା ସଂକଳନ “ମୋହମଗ୍ନା” । “ଝଙ୍କାର” ପତ୍ରିକା ସହିତ ଅନ୍ୟାନ୍ୟ ପତ୍ରପତ୍ରିକାରେ ଅନେକ କବିତା ପ୍ରକାଶିତ ହୋଇଛି ।}