ଭୁବନେଶ୍ଵର : ଓଡ଼ାପଡ଼ା ବ୍ଲକ୍ ଅନ୍ତର୍ଗତ ଖଡ଼ଗପ୍ରସାଦ ସ୍ଥିତ ବ୍ରାହ୍ମଣୀ ପବ୍ଲିକ ସ୍କୁଲରେ ୯୦ତମ ଉତ୍କଳ ଦିବସ ମହା ସମାରୋହରେ ପାଳିତ ହୋଇଯାଇଛି । ବିଦ୍ୟାଳୟର ଅଧ୍ୟକ୍ଷ ଡକ୍ଟର ନୀହାର ରଞ୍ଜନ ସିଂହଙ୍କ ପୌରୋହିତ୍ୟରେ ଅନୁଷ୍ଠିତ ଉକ୍ତ ଉତ୍ସବରେ ମୁଖ୍ୟଅତିଥି ବ୍ରାହ୍ମଣୀ ସାହିତ୍ୟ ଓ ସଂସ୍କୃତି ମଞ୍ଚର ସଂପାଦକ ଶ୍ରୀଯୁକ୍ତ ନାୟକ ଅକ୍ଷୟ ରାଜହସ୍ତୀଙ୍କ କରକମଳରେ ଦୀପ ପ୍ରଜ୍ଜ୍ୱଳନ କରାଯାଇ ଉତ୍ସବର ଅୟମାରମ୍ଭ କରାଯାଇଥିଲା । ପରେପରେ ଶିକ୍ଷୟିତ୍ରୀମାନଙ୍କ
ଦ୍ଵାରା ସ୍ଵାଗତ ସଙ୍ଗୀତ ଗାନ କରାଯାଇଥିଲା ।
ସଭାମଞ୍ଚ ପରିଚାଳନା କରିଥିଲେ ଓଡ଼ିଆ ଶିକ୍ଷକ ମଦନମୋହନ ମିଶ୍ର, ଶିକ୍ଷୟିତ୍ରୀ ଗୀତା ପଟ୍ଟନାୟକ, ମାନସୀ ଜେନା । ଅଧ୍ୟକ୍ଷ ମହୋଦୟ ସ୍ଵାଗତ ଅଭିଭାଷଣ ସହିତ ମୁଖ୍ୟ ଅତିଥିଙ୍କର ପରିଚୟ ପ୍ରଦାନ କରିଥିଲେ । ବିଦ୍ୟାଳୟର ବରିଷ୍ଠ ଶିକ୍ଷକ ଶ୍ରୀଯୁକ୍ତ ହୃଷିକେଶ ତ୍ରିପାଠୀ ମହୋଦୟ ଉତ୍କଳ ଦିବସ ପାଳନର ଆଭିମୁଖ୍ୟ ଉପସ୍ଥାପନ କରିଥିଲେ । ଜୀବନରେ ଯେତେ ଉପରକୁ ଉଠିଲେ ବି ମାଆ, ମାଟି ଓ ମାତୃଭୂମିକୁ ଭଲପାଇବା ଓ ଉନ୍ନତି ପାଇଁ କାର୍ଯ୍ୟକରିବାକୁ ମୁଖ୍ୟଅତିଥି ତାଙ୍କ ଭାଷଣରେ ଛାତ୍ରଛାତ୍ରୀମାନଙ୍କୁ ପରାମର୍ଶ ଦେଇଥିଲେ । ଏହାସହିତ ଛାତ୍ରଛାତ୍ରୀମାନଙ୍କ ଦ୍ଵାରା ଶିଶୁକବି ସମ୍ମିଳନୀ ଅନୁଷ୍ଠିତ ହୋଇଥିଲା । ଛାତ୍ରଛାତ୍ରୀମାନେ ସ୍ଵ-ରଚିତ କବିତା ପାଠ କରିଥିଲେ । ଅନ୍ୟତମ ନିମନ୍ତ୍ରିତ ଅତିଥି ଶ୍ରୀଯୁକ୍ତ ଅର୍ଜୁନ କୁମାର ପ୍ରଧାନ ଶିଶୁମାନଙ୍କର କବିତାପାଠର ଭୁରିଭୁରି ପ୍ରଶଂସା କରିଥିଲେ । ଏହି ପରିପ୍ରେକ୍ଷୀରେ ସମବେତ କଣ୍ଠରେ ବନ୍ଦେ ଉତ୍କଳ ଜନନୀ ସଂଗୀତ ଗାନ କରାଯାଇଥିଲା । ସର୍ବଶେଷରେ ବରିଷ୍ଠ ଓଡ଼ିଆ ଶିକ୍ଷକ ମଦନମୋହନ ମିଶ୍ର ଧନ୍ୟବାଦ ଅର୍ପଣ କରିଥିଲେ । ବିଦ୍ୟାଳୟର ଛାତ୍ରଛାତ୍ରୀ, ଶିକ୍ଷକ ଶିକ୍ଷୟିତ୍ରୀ ଓ ଅନ୍ୟ କର୍ମଚାରୀଙ୍କ ପୂର୍ଣ୍ଣ ସହଯୋଗରେ କାର୍ଯ୍ୟକ୍ରମଟି ସାଫଲ୍ୟ ମଣ୍ଡିତ ହୋଇଥିଲା ।
