ଭୁବନେଶ୍ଵର : ଯେଉଁମାନଙ୍କ ପାଇଁ ଆଜି ଓଡ଼ିଆ ଭାଷା ବଞ୍ଚିଛି ଆମେ ସେମାନଙ୍କୁ ବଞ୍ଚାଇ ରଖିବା ନିହାତି ଆବଶ୍ୟକ । ନହେଲେ ଆମ ଆଗାମୀ ପିଢି ଓଡ଼ିଆଙ୍କ ଗର୍ବ ଗୌରବର କଥା ପାଶୋରି ଯିବେ । ଓଡ଼ିଆ ଅସ୍ମିତାର ସୁରକ୍ଷା କିପରି କରାଯିବ ତାହାକୁ ନେଇ ପ୍ରତ୍ୟେକ ଓଡ଼ିଆ ଚେଷ୍ଟା କରିବା ଦରକାର । ସରକାର ଏ କ୍ଷେତ୍ରରେ ପାଦେ ଆଗୁଆ ଚାଲୁଛନ୍ତି, କେବଳ ଜଣସାଧାରଣଙ୍କ ସହଯୋଗ ଦରକାର । ଆଜି ସନ୍ଧ୍ୟାରେ ଓଡ଼ିଏମ୍ ପବ୍ଲିକ ସ୍କୁଲ ପରିସରରେ ଅନୁଷ୍ଠିତ ‘ଉତ୍କଳ ପ୍ରତିଭା ସମ୍ମାନ-୨୦୨୫’ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗଦେଇ ଆଇନମନ୍ତ୍ରୀ ପୃଥ୍ଵୀରାଜ ହରିଚନ୍ଦନ ଏହା କହିଛନ୍ତି ।
ଏହି କାର୍ଯ୍ୟକ୍ରମରେ ହାଇକୋର୍ଟର ବିଚାରିପତି ଆଦିତ୍ୟ କୁମାର ମହାପାତ୍ର ସମ୍ମାନିତ ଅତିଥିଭାବେ ଯୋଗଦେଇ ଓଡ଼ିଆ ପାଇକମାନଙ୍କୁ ଆଜିର ଯୁବପିଢି ମନେରଖିବା ଦରକାର ବୋଲି ମତ ପ୍ରକାଶ କରିଥିଲେ । ଶିକ୍ଷାନୁଷ୍ଠାନ ସମୂହର ପ୍ରତିଷ୍ଠାତା ସତ୍ୟବ୍ରତ ମୀନକେତନଙ୍କ ପୌରହିତ୍ୟରେ ଅନୁଷ୍ଠାନ ଏହି କାର୍ଯ୍ୟକ୍ରମରେ କଳା, ସାହିତ୍ୟ, ଭାଷା, ବିଜ୍ଞାନ, ନୃତ୍ୟ ଓ ଗୀତ କ୍ଷେତ୍ରରେ ସୁନାମ ଅର୍ଜନ କରିଥିବା ୧୧ ଜଣ ପ୍ରତିଭାମାନଙ୍କୁ ‘ଉତ୍କଳ ପ୍ରତିଭା ସମ୍ମାନ – ୨୦୨୫’ରେ ସମ୍ମାନିତ କରାଯାଇଥିଲା । ସମ୍ବର୍ଦ୍ଧିତ ପ୍ରତିଭାମାନେ ହେଉଛନ୍ତି ‘ସମ୍ବାଦ’ ଓ ‘କନକ ନ୍ୟୁଜ’ର ସମ୍ପାଦକ ତନୟା ପଟ୍ଟନାୟକ, ଡିଏଭି ଆଞ୍ଚଳିକ ନିର୍ଦ୍ଦେଶକ କେଶବ ଚନ୍ଦ୍ର ଶତପଥୀ, ଅଧ୍ୟାପିକା ପଦ୍ମଶ୍ରୀ ଅଦୈତ ଚରଣ ଗଡ଼ନାୟକ, ଆନ୍ତର୍ଜାତିକ ହକି ଖେଳାଳି ଅମିତ ରୋହିଦାସ, ଅଭିନେତା ସବ୍ୟସାଚୀ ମିଶ୍ର, ସମାଜସେବୀ ଜଗନାନନ୍ଦ, ଡା. ଶଙ୍କର ରାମଚନ୍ଦନୀ, ‘ପ୍ରମେୟ’ ସମ୍ପାଦକ ଗୋପାଳ କୃଷ୍ଣ ମହାପାତ୍ର, ଆଇପିଏସ ସୌମେନ୍ଦ୍ର ପ୍ରିୟଦର୍ଶୀ, ଉଦ୍ୟୋଗପତି ପ୍ରିୟଦର୍ଶୀ ନାନୁ ପାଣି । ପଦ୍ମଶ୍ରୀ ପ୍ରତିଭା ଶତପଥୀଙ୍କ ଅନୁପସ୍ଥିତିରେ ତାଙ୍କ ଝିଅ ମଧୁପ୍ରଦା ଶତପଥୀ ସମ୍ମାନ ଗ୍ରହଣ କରିଥିଲେ । ଶେଷରେ ସମସ୍ତ ଅତିଥିମାନଙ୍କ ଦ୍ଵାରା ‘ଉତ୍କଳ ପ୍ରତିଭା-୨୦୨୫’ ପତ୍ରିକା ଉନ୍ମୋଚିତ ହୋଇଥିଲା । ଏହି କାର୍ଯ୍ୟକ୍ରମକୁ ବିଦ୍ୟାଳୟର ନିର୍ଦ୍ଦେଶିକା ଇନ୍ଦୁମତୀ ରାୟ, ବିଦ୍ୟାଳୟ ପରିଚାଳନା କମିଟିର ସଭାପତି ପ୍ରଫେସର ପିକେ ଦାସ ଓ ମୁଖ୍ୟ କାର୍ଯ୍ୟନିର୍ବାହୀ ଅଧକାରୀ ସ୍ଵୟନ ସତ୍ୟେନ୍ଦୁ ପରିଚାଳନା କରିଥିଲେ ।
