ସତ୍ୟନାରାୟଣ ଗନ୍ତାୟତ

ପାଟି ଅଛି ଆଉ ଫୁଟୁଛି ମାନେ ନିଶ୍ଚେ କଥା କହି ହେବ । ତେବେ ଏହି କହିବା ନେଇ କ’ଣ କିଛି କହିବାର ନଥାଏ ? ଏମିତିକା କଥା ମନକୁ ସେତେବେଳେ ଆସିଥାଏ ଯେତେବେଳେ ଦେଖାଯାଏ ଯେ ଜଣେ କହିବାରେ ଲାଗିଛି ଯେ; ଲାଗିଛି ।

ଆପଣ ଢେର ସମୟ ତଳେ ସେଠି ଥିଲେ, ଯାହା ସହରର ମୁଖ୍ୟ ବଜାରରେ ଥିବା ଆପଣଙ୍କ ଜଣେ ପାରିବାରିକ ବନ୍ଧୁଙ୍କ ଘରର ଡ୍ରଇଂ ରୁମ୍ ସଂଲଗ୍ନ ଷ୍ଟେସନାରୀ ଦୋକାନ । ସେଠାବରେ ଜଣେ ମହାଶୟ ଅବରଣରେ ମଧ୍ୟ ପାତ୍ର ବନି ଅଚାନକ ହାବୁଡ଼ି ଯାଇଥିଲେ । ଆଉ ତୁରିତେ ଆପଣା ଛାଏଁ ଖାଲି ପଡ଼ିଥିବା ଷ୍ଟୁଲଟିକୁ ଅକ୍ତିଆର କରି ନେଇ ତା’ ଉପରେ ଆପଣାକୁ ଗୋଟାପଣେ ଥୋଇ ପକାଇ ସମବେତ ପ୍ରତ୍ୟେକଙ୍କୁ “ଆଉ ଖବର କ’ଣ ?” ଉଚ୍ଚାରଣ ପୂର୍ବକ ଆରମ୍ଭ କରି ଦେଇଥିଲେ ତାଙ୍କର ଚବରଚବର ହେବା ଅର୍ଥାତ କଥା କହିବା ।

ତହୁଁ ଉପସ୍ଥିତ ସଭିଏଁ ଏକକାଳୀନ “ହଁ ଭଲ” କହି ଦେଇ ଓ ଆପଣଙ୍କ ଦୋକାନୀ ବନ୍ଧୁଙ୍କ ଉଦ୍ଦେଶ୍ୟରେ ପଳାୟନ ସୂଚକ ହାତ ହଲାଇ ସେଠୁ ନିଷ୍କ୍ରାନ୍ତ ହୋଇ ଯାଆନ୍ତେ ଆପଣ ବି ଅନୁଭବ କଲେ ଯେ ଏ ମହାଶୟଙ୍କ ଏମନ୍ତ ସଶବ୍ଦ ଉପସ୍ଥିତିରେ ବନ୍ଧୁଙ୍କ ସହ ଆପଣଙ୍କ ପାରିବାରିକ ଆଳାପ ଆଲୋଚନା ହେବା ନଦାରଦ । ସୁତରାଂ ଆପଣ ବି “ତୁମେ ଦୁହେଁ କଥା ହେଉଥାଅ, ମୁଁ ଟିକେ ଅନ୍ୟ କାମ ସାରି ଆସୁଛି” କହି ବାହାରି ଆସିଲେ ।

ଆପଣଙ୍କ ଅନ୍ୟ କାମମାନ ସାରି ଅନେକ ସମୟ ଧରି ବାହାରେ ରହିବା ପରେ ଏଥର ବନ୍ଧୁଙ୍କ ପାଖକୁ ଯାଇହେବ କି ନା ଭାବିବା ଆରମ୍ଭ କରିଛନ୍ତି କି ନାହିଁ ଆପଣଙ୍କ ମନ ଜାଣିବା ପରି ବନ୍ଧୁଙ୍କଠୁ ହ୍ୱ।ଟସ ଆପ ମେସେଜ ଆସିଲା :

“ବାବୁ ଜଣକ ସେତେବେଳଠୁ ଏଠି ତୁଚ୍ଛା ମାହାଳିଆରେ ବସି ବକରବକର ହୋଇ ମୋ ମୁଣ୍ଡ ଖାଇଲେଣି । ତୁମେ ବାବୁ ଗୋଟେ ଉପକାର କର । ମୋତେ ଫୋନ କରି ସ୍ୱର ବଦଳାଇ ମିଛେମିଛେ କହ ଯେ ତୁମେ ବ୍ୟାଙ୍କ ଅଫିସର ଓ ମୁଁ କରିଥିବା ଦରଖାସ୍ତର କିଛି ସ୍ଥାନରେ ଦସ୍ତଖତ ଛାଡ଼ି ଦେଇଛି । ଶୀଘ୍ର ବ୍ୟାଙ୍କକୁ ଯାଇ ତୁମ ସାମ୍ନାରେ କିଛି ଫର୍ମରେ ଦସ୍ତଖତ ନକଲେ ମୋ ଦରଖାସ୍ତ ନାକଚ ହୋଇଯିବ । ତମଠୁ ଏହା ଶୁଣି ମୁଁ “ହଁ ହଁ ହେଇ ଦୋକାନ ବନ୍ଦ କରି ଶୀଘ୍ର ଆସୁଛି” କହି ଦୋକାନ ବନ୍ଦ କରିବା ଭଳି ଅଭିନୟ ନକଲେ ଏ ବାବୁ ଏଠୁ ଆଉ ଘୁଞ୍ଚିବେନି ।”

ତ’ ଆପଣ ସେଇଆ କରିବାରୁ ହିଁ ଅଗତ୍ୟା ମହାଶୟ ସେଠୁ ଗଲେ । କିଛି ସମୟ ପରେ ଆପଣଙ୍କୁ ଆପଣଙ୍କ ବନ୍ଧୁ ଧନ୍ୟବାଦ ଜଣାଇବାକୁ ଫୋନ କରନ୍ତେ ଆପଣ ଏଥର ନିଶ୍ଚିତ ହୋଇ ତାଙ୍କ ଘରକୁ ଗଲେ ଓ ଆପଣଙ୍କ ଆଳାପ ଆଲୋଚନା ସମ୍ଭବ ହୋଇପାରିଲା । ତେବେ କୌତୁହଳ ବଶତଃ ଆପଣ ବନ୍ଧୁଙ୍କୁ ପଚାରିଲେ “ଏଥର କହିଲେ, ଆଉ ଖବର କ’ଣ ବୋଲି ପଚାରିବା ପରେ ସେ ବାବୁ କ’ଣ କ’ଣ ସବୁ ଭାଷି ଯାଇଛନ୍ତି ?”

ଆପଣଙ୍କ ପ୍ରଶ୍ନ ଶୁଣି ବନ୍ଧୁଙ୍କ ମୁହଁ ବଡ଼ ବିକଳ ଦିଶିଲା । ସେ କହିଲେ :

“ହଁ ରୀତିମତ ତୁହାକୁ ତୁହା ଭାଷଣର ବର୍ଷା ହିଁ ହେଲା ବୋଲି ଜାଣ । ତୁମେ ସବୁ ସିନା ହାତ ହଲାଇ ପଳାଇ ଯାଇ ମୁକ୍ତି ପାଇଗଲ ! ହେଲେ ମୁଁ “ହଁ ଏକରକମ ଭଲ” ବୋଲି କହୁକହୁ ସେ ଆରମ୍ଭ କରିଦେଲେ : କେମିତି ଭଲ ବୋଲି କହି ପକାଉଛ ? ପୃଥ୍ଵୀ ରସାତଳଗାମୀ ହେବାକୁ ବସିଲାଣି ପରା ? ତା’ପରେ ସାରା ଜଗତ ବିଶ୍ୱ ବ୍ରହ୍ମାଣ୍ଡଠୁ ଆରମ୍ଭ କରି ଯାବତ ସମସ୍ୟାମାନଙ୍କ କଥା ବଖାଣି ଗଲେ । ତା’ପରେପରେ ଫେର୍ କହିଲେ, ଏଭଳି ସ୍ଥିତିରେ ଆମ ଦେଶ ଅବସ୍ଥା ଆଉ ଭଲ ରହିବ କୁଆଡ଼େ କହିଲ ? ସହଜେ ତ ଆମର …କହି ଦେଶର ଏମିତି କୌଣସି କ୍ଷେତ୍ର ନାହିଁ ଯାହା ବାଦ୍ ପଡ଼ିଲାନି ତାଙ୍କ ବକବାସରେ । ଉଗାଳି ଚାଲିଲେ ସବୁ କ୍ଷେତ୍ରରେ କେମିତି ଆମେ ଚରମ ଦୁରବସ୍ଥା ଭିତରେ ରହିଛୁ ଅନ୍ୟ ଦେଶଙ୍କ ତୁଳନାରେ ।”

“ତା ପରେ ଆମ ରାଜ୍ୟ କଥା ନିଶ୍ଚେ କହିଥିବେ ?” ବୋଲି ଆପଣ ପଚାରନ୍ତେ ବନ୍ଧୁ କହିଲେ “ଠିକ୍ ପଚାରିଛ, ଆମ ରାଜ୍ୟ କଥା ତ ଏତେ ଗପିଲେ ଯେ କହିଲେ ନସରେ ! ଏପରିକି ଆମ ଜିଲ୍ଲାର ଓ ଆମ ସହରର ଅତୀତ କଥା ଉଠାଇ ଅନର୍ଗଳ ଭାଷଣ ଦେଇ କହିଲେ ଯେ କ’ଣ ନଥିଲା ଓ ଏବେ କ’ଣ ନହେଉଛି ! “

ମୋତେ ଏସବୁ ଶୁଣି ଲାଗୁଥିଲା ବଡ଼ ବିଚରା ବନ୍ଧୁ; କେତେ ମାନସିକ କଷ୍ଟ ଅନୁଭବ କରି ନଥିବେ ଏଭଳି ନଛୋଡ଼ବନ୍ଧା କଥାକୁହାଙ୍କ ଦୌରାତ୍ମ୍ୟ ସହିବା ଭିତରେ ! ହେଲେ ଥରେ ସିନା ବ୍ୟାଙ୍କର ବାହାନା କରି ମୁକୁଳି ପାରିଲେ ! ସତରେ ଏଥକୁ କ’ଣ ଆଉ କିଛି କରି ହେବନି ?

ଆମେ ଏନେଇ ଭାବିବାବେଳେ ମନେ ପଡ଼ିଗଲା ଆମର ଆଉଜଣେ ହିନ୍ଦୀ ଭାଷୀ ସାଙ୍ଗ ତା’ ଲୁଗା ଦୋକାନର କାଉଣ୍ଟର ପାଖରେ ଫୋନ ପେ’ ସ୍କାନର ସହ ଆଉଗୋଟେ ପ୍ଲେଟରେ “ୟହାଁ ବେକାର୍ ବୈଠନା ମନା ହୈ” ଲେଖି ରଖନ୍ତେ କେମିତି କେବଳ ଗରାଖଙ୍କ ଛଡ଼ା ଅଯଥା ଲୋକଙ୍କ ଭିଡ଼ ଆଦୌ ରହୁ ନଥିଲା । ତ’ ଆମେ ଆମର ଏହି ବନ୍ଧୁଙ୍କୁ ବି ସେଭଳି “ଏଠି ତୁଚ୍ଛାରେ ବସି ଗପିବା ମନା” ଲେଖାଥିବା ପ୍ଲେଟଟାଏ କାଉଣ୍ଟର ପାଖରେ ସଭିଙ୍କୁ ଦିଶିବା ଭଳି ରଖିବାକୁ କହିଲୁ ।

ଆମ କଥା ଶୁଣି ସେ କିଞ୍ଚିତ ଆଶ୍ୱସ୍ତ ହେଲେ ହେଁ କଥାକୁହାଙ୍କ ବକବାସ୍ ଶୁଣିଶୁଣି ଏଡ଼ିକି ନିପୀଡ଼ିତ ହୋଇ ଯାଇଥିଲେ ଯେ ପୁଣି ଧୀରେ କହିଲେ “ତଥାପି ଯଦି ସେ ଆସି ପହିଲେ ଧୀରେ ବସି ପଡ଼ି ପରେ ଯଦି, ପୁଣି….”ଆମେ ତାଙ୍କ ଶଙ୍କିତ କଥା ବୁଝି ଯାଇ ଆମ ଆଡୁ ଆଉ ଏକ ଇଲମ ଦେବା କ୍ରମରେ କହିଲୁ : ତ’ ସେ ଦୋକାନ ଆଡ଼ିକି ଆସି ଦୋକାନ ଆଗରେ ଦିଶୁଦିଶୁ ଆଉଗୋଟେ ପ୍ଲେଟ ସେଠି ରଖିଦେବ ଯହିଁରେ ଲେଖାଥିବ : “ବକବାସ୍ କରିବାର ଥିଲେ କାଲିକି ଆସନ୍ତୁ” !

ବନ୍ଧୁଙ୍କୁ ଏଥର ଆମ କଥାଟି ମନକୁ ପାଇଲା କି କ’ଣ ସେ କହି ଉଠିଲେ : ହଁ ନିହାତି ନିର୍ଲଜ ହୋଇଥିଲେ ହିଁ “କାଲିକି ଆସ” ଚେତାବନୀ ଶୁଣି କୃତାର୍ଥ ହେବାକୁ ସେ ନିତି ଆସି ଫେରି ଯାଉଥିବେ !!

ଦେଖାଯାଉ : ସମ ସ୍ୱରରେ କହି ଉଠିଲୁ ଆମେ ଦୁହେଁ !!

କସ୍ମରୀ ନଗର, ରାୟଗଡା, ମୋ – ୯୪୩୭୯୦୯୬୭୫

ଲେଖକ ପରିଚୟ

କବିତା, ଗଳ୍ପ, ରମ୍ୟକଥା ଓ ଅନୁବାଦ ସମେତ ସାହିତ୍ୟର ବବିଧ ବିଭାଗରେ ଦୀର୍ଘକାଳ ଧରି କଲମ ଚାଳନା କରି ଆସୁଥିବା ପ୍ରବୀଣ ସ୍ରଷ୍ଟା ସତ୍ୟନାରାୟଣ ଗନ୍ତାୟତ ଜଣେ ସୁପରିଚିତ ସ୍ତମ୍ଭକାର ମଧ୍ୟ । ସାହିତ୍ୟ ସମ୍ପାଦନା ଓ ସଙ୍ଗଠନରେ ବି ଧୂରୀଣ ସ୍ରଷ୍ଟା ଏଲ୍ଆ.ଇ.ସି.ର ପ୍ରଶାସନିକ ସେବାରୁ ଅବସର ପରେ ସମ୍ପ୍ରତି ରାୟଗଡ଼ାର ସ୍ଥାୟୀ ବାସିନ୍ଦା ଭାବେ କସ୍ମରୀ ନଗର, ରାୟଗଡ଼ା ସ୍ଥିତ ନିଜ ନିବାସ “ସୁହାସିତମ୍”ରେ ସୃଜନ ମଗ୍ନ ।

Related Posts

Leave a Reply

Your email address will not be published. Required fields are marked *