ଭୁବନେଶ୍ଵର : ଓଡ଼ିଆ ସାହିତ୍ୟର ଉତ୍କର୍ଷ ପାଇଁ ପ୍ରତିବଦ୍ଧ ପ୍ରାପ୍ତି ଫାଉଣ୍ଡେସନର ପ୍ରଥମ ସାହିତ୍ୟ ସମ୍ବର୍ଦ୍ଧନା ଉତ୍ସବ ଗତକାଲି ଶନିବାର ସନ୍ଧ୍ୟାରେ ଭୁବନେଶ୍ଵରର ଏକ ହୋଟେଲରେ ଅନୁଷ୍ଠିତ ହୋଇଯାଇଛି । ଏହି ଅବସରରେ ୨୦୨୩ ଟାଇମପାସ ପ୍ରକାଶନ ପ୍ରକାଶିତ କବିତା ପୁସ୍ତକ ‘ଯା କହିଲେ ଯିବିନି’ ପାଇଁ ଯୁବ କବି ଆଶିଷ କୁମାର ମିଶ୍ରଙ୍କୁ ‘ପ୍ରତିଭା ଶତପଥୀ କବିତା ପୁରସ୍କାର’, ୨୦୨୪ ପଶ୍ଚିମା ପ୍ରକାଶନ ‘କାଠ ଓ ଅନ୍ୟାନ୍ୟ ଗଳ୍ପ’ ପାଇଁ ଗାଳ୍ପିକ ଅମୀୟ ବେଜଙ୍କୁ ‘ପ୍ରାପ୍ତି କଥା ପୁରସ୍କାର’ ଏବଂ ଅନୁବାଦ ଲାଗି ସାମଗ୍ରୀକ କୃତି ପାଇଁ ସ୍ନେହପ୍ରଭା ଦାସଙ୍କୁ ‘ପ୍ରାପ୍ତି ଅନୁବାଦ ପୁରସ୍କାର’ ପ୍ରଦାନ କରାଯାଇଛି । ପ୍ରତ୍ୟେକଙ୍କୁ ଉତ୍ତରୀୟ, ଫଳକ ଓ ପୁରସ୍କାର ରାଶି ପଚାଶ ସହସ୍ର ପ୍ରଦାନ କରାଯାଇଥିଲା ।
ପୁରସ୍କାର ପାଇବା ଅବସରରେ ଯୁବ କବି ଆଶିଷ କହିଥିଲେ, ସବୁ ସ୍ଥାନରେ କବିତା ଅଛି ଏବଂ ସମସ୍ତେ କବିତା ଲେଖିବା ଦରକାର । ସେ ବିଶିଷ୍ଟ କବି ଡ. ପ୍ରତିଭା ଶତପଥୀଙ୍କ କବିତାର କିଛି ଧାଡ଼ି ଉଦ୍ଧାର କରିବା ସହ ‘ପୋଷାକ’ ଉପରେ ନିଜର ଏକ କବିତା ପାଠ କରିଥିଲେ । ସେହିପରି ଗାଳ୍ପିକ ଅମୀୟ ‘ସମାଧି’ ଗଳ୍ପ ପାଠ କରିଥିଲେ । ଅନୁବାଦିକା ସ୍ନେହପ୍ରଭା ଅନୁବାଦ ମାଧ୍ୟମରେ ପାଠକର ବିଶ୍ଵାସ ଜିଣିବା ଏବଂ ତାକୁ ନେଇ ଲେଖିବା ଉପରେ ଗୁରୁତ୍ୱ ଦେଇଥିଲେ । ସମସ୍ତେ ଖୁସି ବ୍ୟକ୍ତ କରିବା ସହିତ ଅନୁଷ୍ଠାନକୁ କୃତଜ୍ଞତା ଜଣାଇଥିଲେ । ସଭାରେ ବିଶିଷ୍ଟ କବି ଡ. ପ୍ରତିଭା ଶତପଥୀଙ୍କୁ ‘ପଦ୍ମଶ୍ରୀ’ ପାଇଁ ସମ୍ବର୍ଦ୍ଧନା କରାଯାଇଥିଲା । ଏହାର ଉତ୍ତରରେ ସେ କହିଥିଲେ, ନୂଆପିଢି ବହୁତ ଭଲ ଲେଖୁଛନ୍ତି । ସେମାନେ ସାହିତ୍ୟ ରଚନାରେ ଅଧିକରୁ ଅଧିକ ମଗ୍ନ ରୁହନ୍ତୁ ।
ଏଥିରେ କେନ୍ଦ୍ର ସାହିତ୍ୟ ଏକାଡ଼େମୀ ପୁରସ୍କୃତ ବିଶିଷ୍ଟ କବି ଓ ଶିକ୍ଷାବିତ ଡ. ବଦ୍ରୀ ନାରାୟଣ ଯୋଗ ଦେଇ ‘କବିତା ଓ ସମାଜ’ ଶୀର୍ଷକ ବକ୍ତୃତା ରଖିଥିଲେ । ସେ କହିଥିଲେ, ‘ସମାଜ ବିନା କବିତା ଆଉ କବିତା ବିନା ସମାଜ ନାହିଁ’ । ଭାରତ ବର୍ଷର ଯେଉଁ ଗାଆଁକୁ ଯିବେ ସେଠି ପ୍ରତି ବ୍ୟକ୍ତିର କଥାରେ କବିତା ଥିବ ନଚେତ କାହାଣୀ । ଆଜିର ଆଧୁନିକ ସମାଜରେ କବିତା କମଜୋର ହୋଇନି ବରଂ ଜଟିଳ ହୋଇଛି । କିନ୍ତୁ ମୋବାଇଲ ଭଳି ଯନ୍ତ୍ର ସବୁଠୁ ବଡ଼ ଆହ୍ଵାନ ହୋଇଛି । ଏହି ଅବସରରେ ସେ କବି ଡ. ଶତପଥୀଙ୍କ କବିତାର ପ୍ରଶଂସା ସହ ଯୁବାବସ୍ଥାରେ ତାଙ୍କ କବିତା ପଢି ପ୍ରେରିତ ହୋଇଥିବା କହିଥିଲେ ।
ଉପସ୍ଥିତ ଅନ୍ୟତମ ଅତିଥି ବିଶିଷ୍ଟ ଲେଖିକା ଓ ପ୍ରଶାସିକା ପାରମିତା ଶତପଥୀ କହିଲେ, ମାଆ ତଥା ବିଶିଷ୍ଟ କବି ଡ. ଶତପଥୀଙ୍କ ଇଚ୍ଛାକୁ ସମ୍ମାନ ଜଣାଇ ଫାଉଣ୍ଡେସନ ଏହି ଉତ୍ସବ ଆୟୋଜନ କରିଛି । ଉତ୍ସବରେ ପଶ୍ଚିମା ସାହିତ୍ୟ ପତ୍ରିକା ମୁଖ୍ୟ ତଥା ପ୍ରକାଶକ ଅଶୋକ ମହାନ୍ତି ସ୍ଵାଗତ ଭାଷଣ ଦେଇଥିଲେ । ସୁଶ୍ରୀ ବର୍ଷା ଆବାହନୀ ସଙ୍ଗୀତ ଗାନ ଏବଂ ଡ. ସନ୍ଦୀପ ମହାପାତ୍ର ସଂଯୋଜନା କରିଥିଲେ । ଫାଉଣ୍ଡେସନ କାର୍ଯ୍ୟନିର୍ବାହୀ ଟ୍ରଷ୍ଟି ଯଶୋବନ୍ତ ଦାସ ଧନ୍ୟବାଦ ଦେଇଥିଲେ ।
