ବିନୟ ମହାପାତ୍ର
ଦୁନିଆର ଭିଡ଼ଭାଡ୍ ବଜାରଠୁ
ବହୁତ ଦୂରରେ,
ସବୁକିଛି ଭୁଲି ଯାଇ,
ପର୍ବତଘେରା ସବୁଜ ଉପତ୍ୟକାର
ଅଜଣା ଏ ଗହନ କାନ୍ତାରେ,
ଅବା କେଉଁ ମରୂର,
ଉତ୍ତପ୍ତ ଶୈକତ ଶେଜରେ,
ମୁଁ ଆଜି ଏକାଏକା
ନିଜେ ନିଜକୁ ଖୋଜୁଛି,
ମୃତ ମୋର ମନ ପାଇଁ
ଦୁଇ ଘଡ଼ି ନିରୋଳା ମୁହୁର୍ତ୍ତ,
ଆଉ, ଦୁଇ ବୁନ୍ଦା ଅମୃତ ଚାହୁଁଛି,
ସତେ ଅବା ଜ୍ୱଳନ୍ତ ପ୍ରାଣ ପାଇଁ
ବୁନ୍ଦାଏ ମନ୍ଦାକିନୀ, ସଲିଳ ମାଗୁଛି ।
ସବୁ ସୁଖ, ଦୁଃଖ, ଖଟା ମିଠା
ଯେତେ ମୋର ଅନୁଭୂତି ଥିଲା,
ବିସ୍ମୃତିର କାଳ କୋଠରୀରେ
ସମସ୍ତଙ୍କୁ ବନ୍ଦ କରି ଦେଲି,
ଯେତେ ମୋର ସମ୍ବନ୍ଧ, ସବୁ ଭୁଲି ଗଲି,
ବିତିଗଲା ଦିନର ରଙ୍ଗିନ୍ ଅବା
କଳା ଧଳା କାଣିଚାଏ ସ୍ମୃତି
ଆଜି ଆଉ ମନେପଡ଼େ ନାହିଁ,
ମନ ଡଷ୍ଟବିନ୍ ମୋର,
ଆଜି ପୁରା ଶୂନ୍ୟ
ନୂଆ ନୂଆ ଅଳିଆ ପାଇଁ,
ଖାଲି କରି ଦେଲି ।
କଥା ପଦକରେ ମୋର
ଆଜି କିଏ ଖୁସି ହୋଇଯିବ,
ସେଇମିତି ମୋର କେହି ନାହିଁ,
ମୋ କାମ, ଅବା କଥା କେଇ ପଦ,
କାହା ମନେ ଦୁଃଖ ଦେଇଦେବ,
ଆଜି ଆଉ ଡର ଲାଗେ ନାହିଁ,
ସେ ଚିନ୍ତା ମୋର, ଆଜି ନାହିଁ ।
ଆସିବାକୁ କେହି ନାହିଁ ଆଜି
କାହା ପ୍ରତୀକ୍ଷାରେ,
ମନେ ଉଦବେଗ ନାହିଁ,
ସଙ୍ଗ ସୁଖ ପାଇଁ ମନ କାହାକୁ ଲୋଡୁନି,
କାହାର ମିଳନ ଉତ୍କଣ୍ଠା, ମନରେ ଜାଗୁନି,
ମୋ ସାନ୍ନିଧ୍ୟ ପାଇଁ ଆଜି,
କେହିବି ଝୁରୁନି,
କେହି ମୋତେ ଛାଡ଼ି ଯିବ ବୋଲି
ମୋତେ ଆଉ ଡରଡର ଲାଗୁନି ।
ରିକ୍ତ ଆକାଶର ମୁକ୍ତ ବିହଙ୍ଗମ ସାଜି
ବିସ୍ତୀର୍ଣ୍ଣ ଆକାଶରେ ମନ ଭରି ଉଡ଼େ,
ଆକାଶର କଳାକଳା ବାଦଲରେ
ବଜ୍ର, ବିଜୁଳିର ଭୟ ନାହିଁ ତିଳେ,
ଜତନରେ ଗଢ଼ା ନୀଡ଼ ମୋର,
ଭାଙ୍ଗିଯିବ ବୋଲି,
ଆଜି ମୋତେ ଡରଡର ଲାଗୁନି,
ଆଉଥରେ ନୂଆ ନୀଡ଼ ଗଢିବାର ସ୍ୱପ୍ନ
ମନେ ମୋର ତିଳେ ମାତ୍ର ଜାଗୁନି ।
ମୁଁ ଯେ ଏକେଲା,
ଏକ ମୁକ୍ତ ବିହଙ୍ଗମ,
କାହା ପାଇଁ ଗଢ଼ିଦେବି ନୀଡ଼,
ଡର ନାହିଁ ମନେ,
ଆଉଥରେ ଜୀବନେ ଆସିବ,
ଫନି ଅବା ଆମ୍ଫାନର ଝଡ଼ ।
ନିଜ ସାଥେ ପ୍ରେମ କରି,
ନିଜ ସାଥେ,
ମନଖୋଲି କଥା ହୋଇ
ନିଜ ସାଥେ ବନ୍ଧୁତା,
କରି ମୁଁ ନେଲିଣି,
ମନେମନେ କଥା କହି,
ନିଜ ଭିତରେ
କେମିତି, ହଜିବାକୁ ହୁଏ
ସେ କଳା ଆଜି,
ଶିଖି ମୁଁ ଗଲିଣି ।
ପଟିଆ, ଭୁବନେଶ୍ୱର
ଲେଖକ ପରିଚୟ
ପିଲାଟି ଦିନରୁ ଗଳ୍ପ ଓ କବିତା ଲେଖିବା ମୋର ଗୋଟିଏ ନିଶା ଥିଲା । ସ୍କୁଲ କଲେଜର ପାଠପଢା ସମୟରେ ଏବଂ ଓଡ଼ିଶାରେ ରହଣି ସମୟରେ ନୟମିତ ଲେଖାଲେଖି କରୁଥିଲି । କିନ୍ତୁ ୩୦ ବର୍ଷ ଓଡ଼ିଶା ବାହାରେ (ଦିଲ୍ଲୀ) ରହଣିରେ ସେଥିରେ ନିଷ୍କ୍ରିୟତା ଆସିଥିଲା । ହେଲେ ଡିସେମ୍ବର ୨୦୧୬ରୁ ଓଡ଼ିଶା ଫେରିବା ପରେ ପୁଣିଥରେ ଲେଖାଲେଖିରେ ସକ୍ରିୟ ଅଛି । ନିଜ ବ୍ଲଗ୍ kathakabita.blogspot.com, mokathamokabita.wordpress.com ରେ ସଙ୍କଳିତ କରିବା ସହିତ “ଷ୍ଟୋରିମିରର” ଓ “ପ୍ରତିଲିପି” ପାଇଁ ନିୟମିତ ଲେଖାଲେଖି କରୁଛି । ବର୍ଷ ୨୦୨୦~୨୨ ମଧ୍ୟରେ ଦୁଇଟି କବିତା ସଙ୍କଳନ ଓ ଦୁଇଟି ଗଳ୍ପ ସଙ୍କଳନ ପୁସ୍ତକ ଆକାରରେ ପ୍ରକାଶିତ ହୋଇସାରିଛି । ବିଭିନ୍ନ ଅନଲାଇନ୍ ମାଗାଜିନରେ ମଧ୍ୟ ମୋର ଗଳ୍ପ ଓ କବିତାଗୁଡ଼ିକ ନିୟମିତ ପ୍ରକାଶିତ ପାଉଛି ।
