ଭୁବନେଶ୍ଵର : ଯେଉଁ ଭାଷାର ଶିଶୁସାହିତ୍ୟ ଯେତେ ସମୃଦ୍ଧ, ସେହି ଭାଷା ଓ ତାର ସାହିତ୍ୟ ସେତେ ରୁଦ୍ଧିବନ୍ତ । ଭାଷା ଓ ତାର ସାହିତ୍ୟକୁ ସମୃଦ୍ଧ କରିବାରେ ସେହି ଭାଷାର ଶିଶୁସାହିତ୍ୟ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଆସିଛି । ଆଜି ଓଡ଼ିଶା ସାହିତ୍ୟ ଏକାଡ଼େମୀ ଓ ଶିଶୁ-କିଶୋର ସାହିତ୍ୟ ଏକାଡ଼େମୀଙ୍କ ମିଳିତ ସହଯୋଗରେ ସଂସ୍କୃତି ଭବନ ସମ୍ମିଳନୀ କକ୍ଷରେ ଅନୁଷ୍ଠିତ ଏକ ଦିବସୀୟ ଶିଶୁସାହିତ୍ୟ ଆଲୋଚନାଚକ୍ର ଓ କବିତା ପାଠୋତ୍ସବରେ ଅତିଥିମାନେ ଏଭଳି କହିଛନ୍ତି ।
କାର୍ଯ୍ୟକ୍ରମକୁ ଭାଷାବିତ ଦେବୀପ୍ରସନ୍ନ ପଟ୍ଟନାୟକ ଉଦଘାଟନ କରିଥିଲେ । ଓଡ଼ିଆ ସାହିତ୍ୟରେ ଉଚ୍ଚ ମୂଲ୍ୟବୋଧର ପ୍ରତିଷ୍ଠା ଓ ଶ୍ରେଷ୍ଠ ମାନର ପ୍ରବର୍ତ୍ତନ ଦିଗରେ ଶିଶୁସାହିତ୍ୟ ଏକ ପ୍ରମୁଖ ଭୂମିକା ଗ୍ରହଣ କରିଛି ବୋଲି ସେ କହିଥିଲେ । ଶିଶୁ-କିଶୋର ସାହିତ୍ୟ ଏକାଡ଼େମୀର ସଭାପତି ପ୍ରଫେସର ଦାଶ ବେନହୁରଙ୍କ ସଭାପତିତ୍ୱରେ ଆୟୋଜିତ ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ମୁଖ୍ୟମନ୍ତ୍ରୀଙ୍କ ମୁଖ୍ୟ ପରାମର୍ଶଦାତା ପ୍ରକାଶ ମିଶ୍ର ଯୋଗ ଦେଇଥିଲେ । କାର୍ଯ୍ୟକ୍ରମରେ ଶିଶୁସାହିତ୍ୟିକ ମହେଶ୍ଵର ମହାନ୍ତି, ଶିଶୁ-କିଶୋର ସାହିତ୍ୟ ଏକାଡ଼େମୀର ସମ୍ପାଦକ ବୀରେନ୍ଦ୍ର ମହାନ୍ତି ଅତିଥି ଭାବେ ଯୋଗ ଦେଇଥିଲେ । କାର୍ଯ୍ୟକ୍ରମରେ ଓଡ଼ିଶା ସାହିତ୍ୟ ଏକାଡ଼େମୀର ସମ୍ପାଦକ ବିରେନ୍ଦ୍ର ମହାନ୍ତି ଅତିଥି ଭାବେ ଯୋଗ ଦେଇଥିଲେ । କାର୍ଯ୍ୟକ୍ରମରେ ଓଡ଼ିଶା ସାହିତ୍ୟ ଏକାଡ଼େମୀ ପ୍ରକାଶିତ ପତ୍ରିକା ‘କୋଣାର୍କ’ ସମେତ ଶିଶୁ-କିଶୋର ସାହିତ୍ୟ ଏକାଡ଼େମୀ ପକ୍ଷରୁ ବହୁ ପୁସ୍ତକ ଲୋକାର୍ପିତ ହୋଇଥିଲା ଏବଂ ଶିଶୁସାହିତ୍ୟିକଙ୍କୁ ସମ୍ବର୍ଦ୍ଧିତ କରାଯାଇଥିଲା ।
ପ୍ରଥମ ଅଧିବେଶନରେ ଏକାଡ଼େମୀର ସଚିବ ଚନ୍ଦ୍ରଶେଖର ହୋତା ସ୍ଵାଗତ ଭାଷଣ ଦେଇଥିଲେ । ଅରବିନ୍ଦ ପଟ୍ଟନାୟକ, ଭାବେ ନରେନ୍ଦ୍ର ପ୍ରସାଦ ଦାସ, ମନୀନ୍ଦ୍ର ମହାନ୍ତି ଓ ବିରେନ୍ଦ୍ର କୁମାର ସାମନ୍ତରାୟ, ଆଶୁତୋଷ ଦେବତା, ମାୟାଧର ସ୍ଵାଇଁ, ଧନଞ୍ଜୟ ସ୍ଵାଇଁ, ଲକ୍ଷ୍ମୀକାନ୍ତ ଖୁଣ୍ଟିଆ, ପରେଶ କୁମାର ପଟ୍ଟନାୟକ, ନମିତା ମହାନ୍ତି, କମଳାକାନ୍ତ ଜେନା, ମହେନ୍ଦ୍ର କୁମାର ମଲ୍ଲିକ ଅତିଥି ଭାବେ ଯୋଗ ଦେଇ ‘ଓଡ଼ିଆ ଭାଷା ସାହିତ୍ୟର ବିକାଶ କ୍ଷେତ୍ରରେ ଶିଶୁସାହିତ୍ୟର ଭୂମିକା’ ଉପରେ ଆଲୋଚନା କରିଥିଲେ । ସେହିପରି ଦ୍ଵିତୀୟ ଅଧିବେଶନରେ ଆୟୋଜିତ ଶିଶୁ କବିତା ପାଠୋତ୍ସବରେ ଲିଙ୍ଗରାଜ ରଥ, ହରିପ୍ରିୟା ପଟ୍ଟନାୟକ, ବିଜୟା ପାତ୍ର, ଶରତ କୁମାର ନାୟକ ଅତିଥି ଭାବେ ଯୋଗ ଦେଇଥିଲେ । ହରିହର ଶୁକ୍ଳା, ପ୍ରକାଶ ଚନ୍ଦ୍ର ଦାଶ, ପ୍ରବିଣା ପରିଡ଼ା, କଳ୍ପନା ମିଶ୍ର ସଂଯୋଜନା କରିଥିଲେ । ସଭାମୁଖ୍ୟ ଭାବେ ଶରତ କୁମାର ବିଶ୍ଵାଳ ଯୋଗ ଦେଇଥିଲେ । ଏକାଡ଼େମୀର ସହସଚିବ ସଞ୍ଜୟ କୁମାର ଛୁଆଳସିଂହ ଅତିଥି ପରିଚୟ ଓ ଧନ୍ୟବାଦ ଦେଇଥିଲେ ।
